Co concurso de pinchos ‘Picacentola’ e un Obradoiro de Cociña en Familia a celebrar o vindeiro sábado ponse fin as activades das XII Xornadas Gastronómicas de Exaltación da Centola, aínda que os pinchos e menús elaborados especialmente polos establecementos hostaleiros da vila poderanse degustar ata o luns 8 de decembro, aproveitando así a ponte da Constitución.
Para este xoves 4 de decembro está programada a elección do mellor PicaCentola, o xurado reunirase ás 12.00 h no Obradoiro de Hostalería do Salnés, nas instalacións da Deputación na Lanzada para elixir o gañador do mellor pincho entre todos os establecementos participantes: A Mariña con ‘Centola estilo Mariña’; Airiños do Mar con ‘dim sums de centola’; Balcón Café Bar con ‘Cazola mariñeira’; Bocadilla Gourmet con ‘Sándwich de rúcula, guacamole de mazá e centola’; Casa Abel con ‘Crocantes de centola’; Mercantil con ‘Canelóns de centola’; Misturas con ‘Centola en tempura’; O Museo con ‘Tosta de centola con cogomelos e queixo de tetila’; O Porto con ‘Pincho estilo Porto’ e Tapería Asador O Trasno con ‘Txangurro de centola en tempura’.
Para o sábado 6 está programado o Obradoiro de Cociña en Familia no establecemento Cociñas Lume da rúa Luis Seoane, debendo inscribirse na oficina de Turismo, no 986 73 14 15 ou a través do correo electrónico oftur@concellodogrove.com.
Concurso centola viva
O Concurso de Centola Viva desta edición que se celebrou na lonxa o pasado 25 de novembro, contou coa participación de 6 pezas –5 femias e 1 macho–. A mellor centola femia pesou 2,100 kg e foi presentada por José María Meis Vila do barco Edi; e a centola macho, que acadou os 4,450 kg foi presentada por Guillermo Martínez Rey do barco Pontes. Os premiados recibiron 150 euros.
Ao día seguinte, o mércores 26 de novembro celebrouse no mercado municipal a poxa destas centolas, en primeiro lugar puxouse pola centola femia que partiu de 50 euros e acadou os 110 euros que ofreceu José Luis Padín Noya, propietario das Marisquerías Solaina.
Por outra banda, a centola macho comezou a partir de 60 euros e chegou ata os 125 euros, neste caso quen puxou ata esa cantidade foi Lorena Moldes, propietaria do Restaurante Pan de Millo. O total do recadado con esta poxa doarase a Cáritas.
Publicado por Todogrove el martes 2 de diciembre de 2014 (Redacción, Fotos de Miguel Muñiz).